ad

गण्डकी प्रदेश सरकारको असन्तुष्टि : बेनी-जोमसोम सडक आयोजनामा किन ढिलाइ?

Nepal Live

म्याग्दी- गण्डकी प्रदेशको लाइफ लाइन घोषित राष्ट्रिय गौरवको बेनी–जोमसोम–कोरला सडक आयोजनाको काममा भएको ढिलाइप्रति गण्डकी प्रदेश सरकारले असन्तुष्टि जनाएको छ। 

आयोजनामार्फत म्याग्दी र मुस्ताङ खण्डमा भइरहेको सडक स्तरोन्नतिको स्थलगत अनुगमनपछि मंगलबार राति बेनी नगरपालिका–९ गलेश्वरमा जनप्रतिनिधि, प्रशासक, सुरक्षा अधिकारी र सरोकारवालासँगको अन्तर्क्रियामा मुख्यमन्त्री पृथ्वीसुब्बा गुरुङले ढिलासुस्तीप्रति असन्तुष्टि व्यक्त गरेका हुन्। 

एक सय १८६ किलोमिटर दूरीको बेनी–जोमसोम–कोरला सडक आयोजना अन्तर्गत १ सय १० किलोमिटरको जोमसोम–कोरला खण्ड स्तरोन्नतिको लागि २०७३ कात्तिक र ७६ किलोमिटर दूरीको बेनी–जोमसोम सडक कालोपत्रेका लागि २०७४ असारदेखि काम सुरु भएको थियो। 

पाँच अर्बभन्दा बढीको लगानीमा निर्माण भइरहेको मित्रराष्ट्र चीनको सिमाना कोरला नाका जोड्ने व्यापारिक महत्वको सडक आयोजनाको सात वटा प्याकेजमध्ये चार वटा प्याकेजमा निर्माण व्यवसायीले अपेक्षाकृत काम गर्न नसकेको पाइएको मुख्यमन्त्री गुरुङले बताए। 

प्रदेशको समृद्धिसँग जोडिएको सडक आयोजनालाई गुणस्तरीय हिसाबले समयमै सम्पन्न गराउन सम्बद्ध अधिकारी र व्यवसायीलाई निर्देशन दिएका मुख्यमन्त्री गुरुङले संघीय सरकारलाई पनि समस्याको बारेमा जानकारी गराउने बताए। 

प्रदेशमा सञ्चालित राष्ट्रिय गौरवका आयोजनालाई गति दिन र देखिएका समस्या समाधानका लागि सहजीकरण गर्न स्थलगत अनुगमन सुरु गरेको सरकारका प्रवक्ता समेत रहेका आन्तरिक मामिला तथा कानुनमन्त्री हरिबहादुर चुमानले बताए। 

प्रदेश सरकारले प्रत्येक स्थानीय तहलाई जोड्ने सडकलाई कालोपत्रे र ग्राभेल गर्ने योजनालाई आर्थिक वर्षमा प्राथमिकताका साथ बजेट विनियोजन गरेको मन्त्री चुमानले जानकारी दिए। (रासस)

तपाईको प्रतिक्रिया

यसमा तपाइको मत


सम्बन्धित समाचार