चितवन- इन्डियन प्रिमियर लिग (आइपिएल) प्रतियोगितामा सानदार प्रदर्शनसँगै सामाजिक सञ्जाल मात्रै होइन, सञ्चारमाध्यममा पनि चर्चा बटुल्न सफल भए, सन्दीप लामिछाने। भारतमा रहेका उनी मात्रै चर्चामा रहेनन् चितवनमा रहेका उनको परिवार पनि सबैको चासो र चर्चामा रह्यो।
पूर्वी चितवनको रत्ननगर नगरपालिका–८ को चित्रसारीमा सन्दीपको घर छ। त्यही घरमा उनका बुबाआमासँगै परिवारको बसोबास छ। टेलिभिजनको पर्दामा सन्दीपको प्रदर्शन हेरेसँगै धेरैको चासो उनको परिवारसम्म पुग्यो। आफ्नो सन्तानको सफलतामा परिवार पनि निकै प्रसन्न हुनु स्वभाविकै हो।
आइतबार साँझ आइपिएलको अन्तिम खेलमा मुम्बई इन्डियन्सविरुद्ध लामिछानेले ३ विकेट लिएपछि अझै उनको चर्चा बढेको छ। उनले खेल क्षेत्रमा गरेको प्रगतिप्रति उनका बुबाआमा दंग परेका छन्। सन्दीपका बुबा चन्द्रनारायण र आमा कोपिलादेवी लामिछाने निकै खुसी देखिएका छन्।
'छोराले खेलकुदका क्षेत्रमा निकै ठूलो प्रगति गरेको देखेर दंग छौँ,' बुबा चन्द्रनारायणले भने। सानैदेखि खेलप्रति रुचि राख्ने सन्दीपले १३ वर्षको उमेरदेखि क्रिकेट खेल्न लागेको उनले बताए। सन्दीपले पाएको सफलताको विषयमा कुरा उठाउँदा भारतीय रेल्वेसेवामा ३८ वर्ष सेवा गरेर फर्किएका चन्द्रनारायण खुसीले गदगद् भइहाल्छन्।
आइपिएलमा पाएको सफलताले सन्दीप अब देशकै छोरा भएको भन्दै भावुक हुँदै चन्द्रनारायणले भने, 'छोरा हामीले पाएका हौँ, तर पनि सन्दीप नेपाल आमाकै छोरा बनेको छ, मैले मेरो मात्रै छोरा भन्न अब पाइनँ।' आफू पनि रेल्वे सेवामा काम गरेका कारण पढ्ने समयमा सन्दीपले निकै सम्झाएको स्मरण गर्दै उनले भने, 'खेलप्रति मेरो लगावको मूल्यांकन हुनेछ र म नेपालबाटै खेल खेल्नेछु, तपाईहरुको नैतिक, भौतिक र आर्थिक सबै सहयोग चाहिन्छ।'
लामिछाने परिवारले सन्दीपले यति छोटो समयमा यति ठूलो प्रगति गर्न सक्छ भन्ने सोचेको पनि थिएन। आइपिएलमा गरेको उत्कृष्ट प्रदर्शनले ३ करोडभन्दा बढी नेपाली, सारा विश्वभरका क्रिकेटप्रेमीका बीचमा सन्दीपले देश चिनाएकोमा आफूलाई गर्व लागेको बुबा बताउँछन्।
आफ्नो चाहना इन्जिनियर बनाउने भए पनि छोराको क्रिकेटमोह देखेर खुल्ला छोडेको बताउँदै उनले भने, 'अहिले त्यही स्वतन्त्रताले मेरो छाती फुलेको छ।'
सन्दीपले आइपिएलमा उत्कृष्ट प्रदर्शन गरेपछि सन्दीपका बारेमा सोधीखोजी गर्दै घरसम्म आउनेको संख्या पनि बढ्दै गएको छ।
आइपिएलमा दिल्ली डेयरडेभिल्सले २० लाख भारुमा सन्दीपलाई टिममा अनुबन्ध गरेको हो।
सन्दीपले प्रतियोगिताको अन्तिम ३ खेल मात्र खेल्न पाउँदा बुबा चन्द्रनारायणलाई पनि केही ढिला खेलाएको अनुभूति भएको छ। 'सायद सन्दीपलाई पत्याएनन् होला, तर मौका आउँदा उसले आफ्नो क्षमता प्रदर्शन गरेरै देखायो,' उनले भने।
अन्तिम खेल खेल्नुअघि आइतबार बिहान ११ बजेतिर सन्दीपले बुबासँग कुरा गरेका थिए। 'आज म्याच छ भन्यो, हालखबर सोध्यो अरु खासै कुरा भएन,' बुबा चन्द्रनारायणले भने।
सन्दीप आगामी मे ३१ मा लर्डस्मा हुने विश्व ११ का तर्फबाट खेल्नेछन्। वेष्ट इन्डिजविरुद्ध हुने खेलमा उनले विश्व चर्चित खेलाडीसँग खेल्न पाउनेछन्। नेपाल आएर बेलायत जाने तयारी रहेको सन्दीपको परिवारले जनाएको छ।
सन्दीपको जन्म स्याङ्जा जिल्लाको आरुचौर हाल अर्जुनचौपारी गाउँपालिकामा भएको हो। चन्द्रनारायणका ५ सन्तानमध्ये सबैभन्दा कान्छा हुन्, सन्दीप।रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।