एसियाली गेम्सको तयारीमा कुनै सम्झौता हुँदैन : केशवकुमार विष्ट, सदस्यसचिव (राखेप)

'प्रतियोगितामा हामी गर्विलो उपस्थिति देखाउन चाहन्छौं'

Nepal Live

काठमाडौं– आगामी भदौ २ देखि १७ गतेसम्म इन्डोनेसियामा हुने १८औं एसियाली खेलकुदमा नेपालले २७ खेलमा भाग लिने भएको छ।

नेपालले एसियाली खेलकुदमा आर्चरी, एथलेटिक्स, बास्केटबल, ब्याडमिन्टन, बक्सिङ, साइक्लिङ, फेन्सिङ, फुटबल, गल्फ, जुडो, कराँते, कबड्डी, लनटेनिस, सुटिङ, पौडी, तेक्वान्दो, टेबलटेनिस, ट्रायथलन, भलिबल, भारोत्तोलन, सेपाकटाक्रो, उसु, स्पोर्टस क्लाम्बिङ, प्याराग्लाइडिङ, कुरास, पेनकक सिटेल र स्केटबोर्डमा प्रतिस्पर्धा गर्दैछ। 

प्रतियोगिताका लागि आइतबारदेखि तयारी सुरु हुँदैछ। पदकका आशा गरिएका केही खेलका खेलाडीलाई विदेशमा प्रशिक्षण गराउने राष्ट्रिय खेलकुद परिषद्ले जनाएको छ। यद्यपि केही खेलाडी छनोटमा भने विवाद देखिएको छ। 

यसै सन्दर्भमा नेपालको तयारी र लक्ष्यबारे नेपाल लाइभका सीताराम कोइरालाले राष्ट्रिय खेलकुद परिषद्का सदस्यसचिव केशवकुमार विष्टसँग कुराकानी गरेका छन्। 

एसियाली खेलकुदमा भाग लिने खेलको छनोट प्रक्रिया कहाँ पुग्यो? 
अहिलेसम्म २७ वटा खेलले भाग लिने पक्का भएको छ। थप ३ वटा खेललाई पनि सहभागी गराउन हामीले प्रयास गरिरहेका छौं। ती ३ खेललाई हामीले वैकल्पिकमा राखेका छौं। सरकारले बजेट उपलब्ध गराएको अवस्थामा खेल थपिन सक्छ। 

अहिले खेलाडी छनोटको प्रक्रिया छ। विवाद भएको खेलको समाधान गर्ने प्रक्रिया पनि थालेका छौं। कराते र तेक्वान्दो खेलाडी छनोटमा विवाद देखिएको छ। हामी समस्या समाधान गर्न छलफल गरिरहेका छौं। अरु खेलहरुको लगभग छनोट टुंगिने प्रक्रियामा छ। 

छनोट टुंगिएका खेलाडीलाई हामीले बन्द प्रशिक्षणमा बैसाख १६ गतेदेखि राख्नेछौं। देशका विभिन्न स्थानमा बन्द प्रशिक्षण सञ्चालन हुन्छ। जेठ १ गतेदेखि केही खेलका खेलाडीलाई ३ महिनाका लागि वैदेशिक प्रशिक्षणका लागि पठाउनेछौं। सम्बन्धित संघसँग सल्लाह गरेर खेलाडी वैदेशिक प्रशिक्षणमा पठाउने तयारी भइरहेको छ। कतिपय खेलका लागि विदेशी प्रशिक्षक नेपालमा झिकाएर पनि प्रशिक्षण गराउनेछौं। यसका लागि हामी संघ, मुख्य प्रशिक्षक र तालिम विभागसँग परामर्श गर्दैछौं। 

वैदेशिक प्रशिक्षणमा जाने खेलको मापदण्ड कसरी तय गरिएको छ? 
सकेसम्म इन्डिभिजुअल खेल र मेडल जित्ने सम्भावना भएका खेललाई विदेशमा पठाउँछौं। तेक्वान्दो, उसु र जुडोका खेलाडीलाई वैदेशिक तयारीमा पठाउने तयारी भइरहेको छ। अन्य खेलका खेलाडीलाई पनि वैदेशिक प्रशिक्षणमा पठाउन परामर्श भइरहेको छ। हाम्रो आर्थिक अवस्था कमजोर भएकाले वैदेशिक सहायता प्राप्त हुने स्थानमा प्रशिक्षणमा पठाउन लागेका हौं। केही सहगोग भएको खण्डमा हामीलाई त्यहाँ खेलाडी पठाउन सजिलो हुन्छ। 

एसियाली खेलकुदको प्रशिक्षणमा खेलाडीले अघिल्ला प्रतियोगिताभन्दा थप सुविधा के पाउँछन् त? 
हामीले राष्ट्रिय टिमको तयारी निरन्तर रुपमा गरिरहेका छौं। प्राय: खेलाडीले नियमित प्रशिक्षण पाइरहेका छन्। हामीले एसियाली खेलका लागि धेरै खेलाडीलाई वैदेशिक प्रशिक्षणमा पठाउछौं। उनीहरुको सुविधामा पनि वृद्धि हुनेछ। १६ घन्टा प्रशिक्षण गर्नुपर्ने भएकाले बन्द प्रशिक्षणलाई कडा निगरानीमा राखिनेछ। 

प्रशिक्षण गर्ने सामग्रीमा कुनै सम्झौता गरिनेछैन। एसियाली खेलकुदमा जस्तो समाग्री प्रयोग हुन्छ त्यस्तै सामग्री तयारीमा प्रयोग गरिनेछ। 

एसियाली खेलकुदमा नेपालको लक्ष्य के हो? संघहरुले परिषद्‌मा कस्तो रिपोर्टिङ गरेका छन्? 
प्रतियोगिताअघि सबैले पदक जित्ने दाबी गर्नु स्वाभाविक हो। तैपनि हामीले मार्सल आर्टसका खेलबाट हामीले बढी आशा गरेका छौं। तेक्वान्दो, कराते, बक्सिङ, जुडो लगायतका खेलबाट आशा छ। पहिलो पटक प्रतिस्पर्धा गर्न लागेको प्याराग्लाइडिङबाट पनि एउटा पदक आउने विश्वास छ। लाग्छ, स्केटिङबाट पनि पदक ल्याउने सम्भावना छ। 

हामीले एसियाली खेलकुदमा पदक प्राप्त गर्ने, साग गेम्समा लागि एक्पोजर पाउन सहभागी हुने, कतिपय नेपालको माटो सुहाउँदो खेल र कुनै राष्ट्रिय खेल भएकाले सहभागी भएका छौं। यीमध्ये पनि पदक ल्याउन सक्ने खेललाई उच्च प्राथमिकतामा राखेका छौं। यी खेलाडीलाई विदेशमा प्रशिक्षणका लागि पठाउनेछौं। 

हाम्रो लक्ष्य बढीभन्दा बढी पदक जित्ने हो। अघिल्लो एसियाली खेलकुदमा हामीले एउटा कास्य मात्र जितेका थियौं। त्योभन्दा राम्रो नजिता ल्याउने हाम्रो कोसिस हुन्छ। यस्तै एसियाली खेलकुदको सहभागिताबाट साग गेम्समा नेपालको प्रदर्शन उच्च होस भन्न हामी चाहन्छौं। खेलकुद भनेको जित्ने मात्र नभई ऐक्यबद्धता पनि जनाउने हो। त्यसैले हामी आफ्नो गर्विलो उपस्थिति देखाउन चाहन्छौं। 

मार्सल आर्टसका खेलमा पदकको बढी सम्भावना छ भन्नुभयो। तर, यी खेलकै खेलाडी छनोटमा विवाद छ। यसले गर्दा त अन्योल बढ्यो नि? 
हामीले कराते विवाद लगभग हल गरिसक्यौं। जो राम्रो खेलाडी छानिन्छ त्यसैले एसियाली खेलकुदमा सहभागी हुन पाउँछ। खेलाडी संघले होइन देशले लाने हो। त्यसलै कसले कुन खेलाडी लाने भनेर विवाद गर्नुको तुक छैन। 

राम्रो खेलाडी जो छ त्यो एसियाली खेलकुदमा जान्छ। राम्रो खेलाडी छाडेर कसैले यो मेरो खेलाडी यो तेरो खेलाडी भन्नु भएन। 

राम्रो खेलाडी को भन्ने छुट्याउन छनोट गर्नुपर्छ। कुन संघको परोस्, मतलव भएन। हामीले यही विधिमा जाऔं भनेका हौं। करातेले मानिसक्यो। तेक्वान्दोले पनि मान्नुपर्छ। सबैले अलि फराकिलो छाती बनाउनुपर्छ। संघ र नेतृत्वको लडाइँ आफ्नो ठाउँमा होला। तर विधि र प्रक्रियाले हल गर्नुपर्छ। 

हामी नेपालको खेलाडी गएर पदक प्राप्त गर्न सकोस् भन्ने चाहन्छौं। यसका लागि राम्रा खेलाडी एसियाली खेलकुदमा जानुपर्छ। त्यसलै खेलाडीलाई पहिलो प्राथमिकतामा राख्नुपर्छ। राम्रो खेलाडीलाई पठाउन नमान्नु भनेको देशको मायाभन्दा पनि जुँगाको लडाइँमा विश्वास रहेछ भन्ने बुझ्नुपर्छ। अहिले विवाद गरेर बस्ने बेला छैन। त्यसैले मैले सबैलाई राम्रो खेलाडी छनोट गरेर पठाउन भनेको छु। 

खेलाडीलाई अन्योलमा राख्ने काम नेतृत्वले गरिरहेको छ। खेलाडीको भविष्यमाथि ख्याल नगर्ने र विवादमा तान्ने नेतृत्व सही होइन भन्ने कुरा खेलाडीले पनि बुझ्नुपर्छ। 

कसले कस्तो कदम चाल्छ भनेर हामीले पनि हेरिरहेका छौं। त्यसैका आधारमा हामी अघि बढ्छौं।

तपाईको प्रतिक्रिया

यसमा तपाइको मत


सम्बन्धित समाचार