ad

दार्चुलामा साढे २ प्रतिशत बालबालिका विद्यालय जानबाट वञ्चित

Nepal Live

दार्चुला– विद्यालय उमेर समूहका २ दशमलब ५ प्रतिशत बालबालिका अझै विद्यालयबाहिर रहेको शिक्षा विकास तथा समन्वय इकाइ, दार्चुलाले जनाएको छ। जिल्लाका १ देखि ५ वर्ष उमेर समूहका विद्यालय भर्ना हुने बालबालिका अझै पनि विद्यालयबाहिर रहेको कार्यालयको तथ्यांक छ। 

नेपालभरिमा नै विद्यार्थी भर्ना दर ९७ दशमलब २ रहेकामा जिल्लाको विद्यार्थी भर्ना दर केही माथि रहेको पाइएको छ। 

यसैबीच आइतबारबाट विद्यार्थी भर्ना अभियान सुरु भएको छ। ‘हामी सबैको इच्छा, अनिवार्य निःशुल्क आधारभुत शिक्षा’ भन्ने नाराका साथ २ चरणमा विद्यार्थी भर्ना अभियान सुरु भएको जिल्ला शिक्षा कार्यालय दार्चुलाका निमित्त जिल्ला शिक्षा अधिकारी जयराज पन्तले जानकारी दिए। पहिलो चरणमा आइतबारदेखि १४ गतेसम्म सघन कार्यक्रमअन्तर्गत विद्यार्थी भर्ना अभियान सञ्चालन गरिने उनले बताए।

यसैगरी पहिलो चरणअन्तर्गत नै विद्यार्थीको हातहातमा निःशुल्क पाठ्यपुस्तक पुग्ने गरी वितरण गरिने कार्यक्रम रहेको छ। 

यस्तै दोस्रो चरणअन्तर्गत १५ देखि ३० गतेसम्म भर्ना हुन छुटेका बालबालिकाको पहिचान गरी भर्ना अभियान सञ्चालन गरिने उनले बताए। दोस्रो चरणअन्तर्गत घरदैलोमै गई विभिन्न छलफल, अन्तरक्रिया तथा अभिमुखीकरण गरी भर्ना हुन छुटेका बालबालिकालाई भर्ना गरिने अभियान सञ्चालन गर्ने तयारी भइरहेको छ। 

जिल्लामा गत वर्षको तथ्यांकअनुसार २ सय ७८ बालबालिका विद्यालयबाहिर रहेका छन्। यस वर्ष कति विद्यालयबाहिर छन् भन्ने कुराको लगत संकलन हुन बाँकी रहेको उनले बताए। गत वर्षको तथ्यांकलाई हेर्ने हो भने जिल्लामा विद्यार्थी भर्ना दर वृद्धि गर्न निकै चुनौती देखिएको छ। बालबालिका विद्यालयबाहिर रहनुको कारणमा आर्थिक अवस्था कमजोर रहेको देखिएको छ। 

जिल्ला शिक्षा कार्यालयको गत वर्षको तथ्यांकअनुसार विद्यालय टाढा भएको कारण ५, शारीरिक अपांगता भएका कारण ७, घरायसी कामले गर्दा १०, पढ्न मन नलागेर ७, अर्काको घरमा काम गर्नु पर्ने कारणले १, बालविवाहका कारण २ र बसाइँसराइका कारण १ तथा अन्य विभिन्न कारणले १ सय ६२ जनाले विद्यालय जान नसकेको तथ्यांक छ। रासस

सम्बन्धित समाचार

तपाईको प्रतिक्रिया

यसमा तपाइको मत