ऋद्धिसिद्धि ज्वेलर्सका सञ्चालकले आफ्नै घरमा गराए साथीको हत्या, ‘बाउन्सर’को प्रयोग

Nepal Live

सुरुङ्गा, झापा- विर्तामोडमा रहेको ऋद्धिसिद्धि ज्वेलर्सका सञ्चालक पारसकुमार देवले आफ्नै साथीको हत्या गरेको खुलासा भएको छ। 

उनले आफ्नै पसलमा राखेका ‘बाउन्सर’को प्रयोग गरेर देवा ज्वेलर्सका सञ्चालक साजन मुखियाको हत्या गरेको खुलासा भएको हो। गत फागुन २० गतेदेखि बेपत्ता बनेका साजनलाई पारसले विर्तामोडस्थित आफ्नै घरमा पुर्‍याएर हत्या गरेको प्रहरीले मंगलबार पत्रकार सम्मेलन गरी घटनाका विषयमा जानकारी गराएको हो। 

घटनामा संलग्न भएको भन्दै ऋद्धिसिद्धि ज्वेलर्सका सञ्चालक २९ वर्षीय देवसहित विर्तामोड–८ त्रिवेणी टोल निवासी १९ वर्षीय दीपेश पौडेल र तेह्रथुमको छातेढुंगा– ८ घर भई विर्तामोड– ३ सैनिक मोड बस्दै आएका २३ वर्षीय प्रकाश भनिने चिरञ्जीवी ओलीलाई प्रहरीले पक्राउ गरी सार्वजनिक गरेको छ। 

उनीहरुलाई मानव अपहरण तथा शरीर बन्धक, खुन डाँका र संगठित अपराधअन्तर्गत मुद्दामा म्याद थप गरी अनुसन्धान सुरु गरिएको जिल्ला प्रहरी कार्यालय झापाका प्रहरी उपरीक्षक विष्णुकुमार केसीले जानकारी दिए। पक्राउ परेका ओली माओवादीका पूर्व लडाकु भएको बताइएको छ। उनी ऋद्धिसिद्धि ज्वेलर्समा ‘वाउन्सर’का रुपमा कार्यरत रहेको बताइएको छ। 

प्रहरीले उनीहरुका साथबाट घटनामा संलग्न भएको एक थान स्कुटर र सुनका गहरगहना, सिमसहितका ६ थान मोबाइल सेटसमेत बरामत गरेको प्रहरी उपरीक्षक केसी बताउनुभयो। घटनामा संलग्न अन्य व्यक्ति पनि रहेकाले उनीहरुको खोजी गरिरहेको प्रहरीले जनाएको छ। हत्यामा संलग्नमध्ये ओलीलाई प्रहरीले तेह्रथुमको संग्रान्ती बजारबाट सोमबार नियन्त्रणमा लिएको जनाएको छ। 

गत फागुन २० गते श्रीमतीलाई मार्केट पुगेर आउँछु भन्दै हिँडेका उनी एकाएक बेपत्ता भएका थिए। बेपत्ता बनेका मुखियाको धारिलो हतियार प्रयोग गरी हत्या गरेको अवस्थामा सोमबार मात्र शव फेला परेको थियो। उनको शव इलामको रोङ गाउँपालिका–३ कोल्बुङ (मेची राजमार्गको लसुने–अर्यालचोक सडकखण्डको जमुने डाँडा)मा सडकबाट करिब १०० फिट तल जुटको बोरामा राखेर फालिएको अवस्थामा भेटिएको थियो। 

यता सुन व्यवसायीको हत्याको विरोधमा मंगलबार विर्तामोड उद्योग वाणिज्य संघ र नेपाल सुनचाँदी व्यवसायी संघ झापाले विर्तामोड बजार बन्द गराएका थिए। (रासस)

प्राप्त प्रतिकृयाहरू

Pradip Adhikari
अपराधीलाई हदै सम्मकाे कारवाहि गर्नुपर्छ

Arjun koirala
Hatyara haru ko karbahi garnuparxa

Amrita Lepcha
Esta hattiyaralai kathor sajaya hoss,mrityu Vanda ni kathor,taaki aba dekhi kasaile Pani hattya garnu Vanda pahila patak patak sochera jhaskine garos

तपाईको प्रतिक्रिया

यसमा तपाइको मत


सम्बन्धित समाचार