चितवनका होटलको मूल्यमा एकरुपता ल्याउन पहल

नेपाल लाइभ

Nepal Live

रत्ननगर – क्षेत्रीय होटल संघ चितवनले पर्यटकीय क्षेत्रका होटलले लिने सेवा शुल्कमा गुनासो बढेपछि मूल्यमा एकरुपता ल्याउन पहल थालेको छ। 

संघका अध्यक्ष सुमन घिमिरेका अनुसार अनलाइनमा सार्वजनिक गराइने ‘सेवा शुल्क दर’ मा आएको गुनासोलाई कम गर्न एकरुपता ल्याउन पहल थालिएको हो। 

अनलाइनमा एउटा दर र लिइने दरमा ठूलो अन्तर भएकाले आएका पर्यटकले भनेअनुसारको सुविधा नपाउने गुनासो बढेको घिमिरे बताउछन्। क्षेत्रीय होटल संघको बैठकले निर्णय नै गरेर होटललाई व्यवस्थापनका लागि आग्रह गरेको छ। 

“होटलले लिने शुल्कभन्दा झण्डै दोब्बर शुल्क ब्रोसर तथा अनलाइनमा राखिने गरेकाले पर्यटकबाट गुनासो आएको हो,” अध्यक्ष घिमिरेले भने। 

पर्यटकीय होटलको सेवामा गुणस्तरीयता ल्याउन र पर्यटकको सहजताका लागि एजेण्टसँग लिने दरमा ५० प्रतिशत नबढाइकन ट्यारिफ कायम गर्न संघले सम्बद्ध होटललाई आग्रह गरेको छ । बढी शुल्क राखेर पछि सेवा त्यहीअनुसारको नपाउँदा पर्यटक रुष्ट हुने गरेका छन्। 

संघले नमूनाका रुपमा ट्यारिफ दर १५० डलर राखिएको भएपनि वास्तविक मूल्य १०० डलर कायम गर्न भनेको छ । यसअघि २०० डरल ट्यारिफ मूल्य राखेका होटलले १०० लडर लिने गरेका थिए। 

सौराहामा दुई रात तीन दिनको प्याकेज होटलअनुसार न्यूनतम ७० डलरदेखि १५० डलर (रु सात हजारदेखि रु १५ हजार)सम्म पर्छ । अन्य महँगा होटलमा रु २० हजारसम्मको प्याकेज रहेको छ । सौराहामा मात्रै ११० भन्दा बढी सुविधायुक्त होटलमा दैनिक दुई हजार ८०० पर्यटक बस्न सक्ने क्षमता छ । पछिल्लो समयमा यहाँ पर्यटक आगमनमा वृद्धि भएको छ। रासस

पढ्नै पर्ने