प्रियंका चोपडाले पढाइन् नारीवादको पाठ, ऋतिक रोशनलाई होला राहत?

नेपाल लाइभ

Nepal Live

नयाँ दिल्ली (एजेन्सी) - पछिल्लो समय बलिउड कलाकार ऋतिक रोशन र कंगना रनोटबीचको अफेयरसम्बन्धी विवाद सार्वजनिक भएपछि बलिउड यतिबेला पक्ष र विपक्षमा बाँडिएको छ।

ऋतिकदेखि अन्य कलाकारले यो प्रकरणलाई पुरुष र महिलाबीचको लडाइँ नबनाउन अपिल गरिरहेका छन् । यसै विवादका बीच अभिनेत्री प्रियंका चोपडाले आफ्नो विचार सार्वजनिक गरेकी छिन्।

उनले आफूलाई नारीवादी भन्दै यो शब्दको अर्थ पुरुषलाई धम्क्याउनु वा घृणा गर्नु भनेर बुझ्न नहुने बताएकी छन् । प्रियंकाले भेराइटी डटकमसँग भनेकी छन्,  'नारीवादको मतलब तपाईं पुरुषलाई धम्क्याउनुस्, उनीहरुलाई घृणा गर्नुस् या आफूलाई उपल्लो तहको ठान्नु भन्ने होइन।' प्रियंका ‘कृष’ फिल्मको सिक्वलमा ऋतिकको को-स्टार रहिसकेकी छन्। 

ऋतिक र कंगनाबीच विवाद चर्किरहँदा प्रियंकाको उक्त भनाइलाई अर्थपूर्ण मान्न सकिन्छ । हालै फरहान अख्तर र यामी गौतमले ऋतिकको खुलेआम साथ दिएका थिए । यसै मेसोमा प्रियंकाले पनि केही संकेत गरेकी छिन्।

प्रियंका चोपडा पछिल्ला दिनमा विदेशमा छिन् । केही दिनअघि उनले इटालीमा गरेको घुमघामको तस्बिर इन्स्टाग्राममा पोस्ट गरेकी थिइन् । प्रियंकाले भारतमा क्षेत्रीय फिल्म निर्माणको काम अघि बढाइरहँदा हलिउडमा उनी ‘अ किड लाइक जेक’ र ‘इजन्ट इट रोमान्टिक’ जस्ता फिल्महरुमा पनि व्यस्त छिन्।

पढ्नै पर्ने