'रुद्रप्रिया'मा मैले आफूलाई परीक्षण गरेकी छु : रेखा थापा

अशेष अधिकारी

Nepal Live

काठमाडौं- रेखा थापाको रिलिज तयारीमा रहेको 'रूद्रप्रिया'माथि सोमबार प्रेसमिट हुँदै थियो। यहाँ मुख्य चर्चा भयो- रेखासँगै आर्यनको। किनकि आर्यन र रेखाको जोडी ८ वर्षपछि कमब्याक हुँदैछ। तर रेखाले भने रूद्रप्रियालाई आफ्नो डेब्यू फिल्म भनेरै घोषणा गरिन्।

एक दशक नेपाली फिल्ममा राज गरेकी रेखाको सफलता लोभलाग्दो छ। उनीको जस्तो लोकप्रियता र सफलता नेपाली फिल्ममा कमै मात्र अभिनेत्रीले पाएका छन्। फिल्ममा हिरो शैलीको प्रस्तुति र अनेक गसिपले पनि उनलाई चर्चामा ल्याइराख्यो। पहिला अभिनेता राजेश हमाल र पछिल्लो समय दयाहाङ राई जस्तै उनीमाथि पनि एउटै शैलीका फिल्म गरेको आरोप भने छ।

रेखाले रुद्रप्रियालाई मेरो डेब्यू फिल्म भन्नुको पछाडि आफू नयाँ ढंगले आएको भन्ने उनको सांकेतिक भनाइ बुझ्न सकिन्थ्यो। फर्मुला शैलीको फिल्म गर्दै आएकी रेखाले यसपटक आफूलाई परीक्षणको कठघरामा उभ्याएकी छन्। उनले यसपटक सीमित समूहबाट बाहिर निस्केर फिल्म निर्माण गरेको र आफूलाई समेत परीक्षणमा उतारेको बताएकी छिन्।

फिल्मका निर्देशक सुदीप बबी भूपालसिंह नयाँ छन्, जसको यो दोस्रो फिल्म हो। उनको अघिल्लो फिल्म मालाले समीक्षकीय रूपमा गतिलो तारिफ बटुलेको थियो। त्यसैले उनले यसपटक रेखालाई लिएर फिल्म गरेकाले नेपाली फिल्मीवृत्त रेखाको नयाँपन कस्तो छ भनेर हेर्न आतुर छ।

प्रेसमिटमा फिल्मका अभिनेता एवं पुरानो पुस्ताका नायक विश्व बस्नेत नयाँ निर्देशकबाट प्रभावित देखिए। कार्यक्रमको अन्तिममा बोलेका उनले फिल्मको कथा आफूलाई हलिउड शैलीको लागेकाले फिल्म गर्न राजी भएको बताए। 

युवती नायिकाका रूपमा रेखाको करिअरको एउटा अध्याय सकिन थालेको छ। उनको फिल्मी करिअरलाई आगामी दिनमा राजनीतिक सक्रियताले निर्धारण गर्नेछ। यस अर्थमा रेखाले रुद्रप्रियाका लागि विशेष मेहनत गरेको बताउँदै आएकी छन्।

'म चुनौतीसँग डराउँदिन। मलाई फरक भूमिकामा कुनै फिल्ममेकरले प्रस्तुत गरेनन्। म जे गरिरहेकी थिएँ, मलाई त्यसैमा दोहोर्‍याउने काम मात्र भयो। मेरो क्षमता त्यतिमात्र थिएन कि,' रेखाले कार्यक्रमपछिको साइडलाइन कुराकानीमा भनिन्, 'त्यसैले यसपटक मैले आफूलाई परीक्षण गरेकी हुँ। यसअघि मैले आफूलाई प्रमाणित गरिसकेँ। यो नयाँ तहको परीक्षा हो, त्यसैले यो मेरा लागि डेब्यू फिल्मजस्तै हो।'

फिल्मको लेखन समेत गरेका निर्देशक सुदीपले सिङ्गापुरमा अध्ययन गरेर म्यानमारको टेलिभिजनमा क्षमता देखाइसकेका छन्। उनको अघिल्लो फिल्मको कथ्य शैली नेपाली फिल्मका लागि नवीन थियो। यसपटक उनले अर्को त्यस्तै काम देखाउनेछन् भन्ने विश्वास उनको अघिल्लो फिल्मबाट प्रभावितहरूको छ।

फिल्मका अभिनेता आर्यन सिग्देलको नजरमा पनि सुदीप राम्रो फिल्मी कन्सेप्ट भएका निर्देशक हुन्। सुदीपसँग मालामा सँगै काम गर्दा उनको शैलीबाट प्रभावित भएकै कारणले आर्यन यो फिल्ममा आबद्ध भए। ३० पानाको मालाको स्क्रिप्टमा फिल्म बनाइरहेका सुदीप आर्यनलाई त्यतिखेरै इन्ट्रेस्टिङ लागेका थिए। 

निर्देशकको यस्तो चर्चा सुनेकी रेखाले माला फिल्म भने हेरेकी छैनन्। चर्चाकै कारण उनले आफ्नो एक फिल्मलाई थाँती राख्दै रुद्रप्रियालाई अगाडि बढाइन्।

रेखा भन्छिन्, 'मैले यो फिल्मबाट मेरा दर्शकको आजसम्मको माया कसरी आउनेछ बनेर कुरिरहेकी छु। फिल्ममा काम गर्दागर्दै आचानक शैली परिवर्तन गर्दा दर्शकले अस्वीकार गर्ने खतरा पनि छ। विगतमा अन्य कलाकारको हकमा त्यो प्रत्युत्पादक भएको छ। तर मैले जे होला भनेर खतरा मोलेँ। बाँकी दर्शकको हातमा छ।'

पढ्नै पर्ने