हिंसा सहन्छन् तर बहुबिवाहको मुद्दा हाल्दैनन् रोल्पाका महिला

Nepal Live

लिबाङ- रोल्पामा बहुविवाहको क्रम बढ्दो भए पनि न्यून उजुरी पर्ने गरेको छ। जिल्ला अदालत रोल्पाको तथ्यांक अनुसार दुई आर्थिक वर्षमा तीनवटा मात्र बहुविवाहका मुद्दा दर्ता भएका छन्। यस आर्थिक वर्षमा दुई र गत वर्ष एउटा मात्र बहुविवाहको मुद्दा दर्ता भएको मुद्दा फाँटका नायब सुब्बा दामोदर दाहालले जनाए।

जिल्ला न्यायाधीश वासुदेवलाल श्रेष्ठका अनुसार माना चामल, अंश, सम्ब न्धविच्छेदजस्ता प्रकृतिका केही मुद्दामा दुईवटी श्रीमती भएको देखिन्छ, तरबहुविवाहको प्रसंग आउँदैन। उनले भने, 'यसरी बहुविवाहविरुद्ध मुद्दा कम पर्नुका कारण बहुविवाह एउटा अपराध हो, उजुरी गर्नुपर्छ भन्ने जानकारी पीडितलाई नभएको हुन सक्छ। साथै, कानुनी अज्ञानताका कारण गाउँ समाजमा मेलमिलाप गराउने प्रचलनले गर्दा मुद्दा नपरेको हुन सक्छ।'

न्यायाधीश श्रेष्ठका अनुसार भद्रभलादमी बसेर बहुविवाहका मुद्दा गाउँमै मिलाउनु गैरकानुनी प्रक्रिया हो तर पनि गाउँ समाजमा मिलेर बस्नुपर्छ भन्ने सोचका कारण यस्ता प्रवृत्तिले अदालतमा प्रवेश नपाएको हुनसक्ने उनले बताए। 

यस्तै, जिल्ला न्यायाधिवक्ता सीताराम अर्यालका अनुसार जिल्लामा बहुविवाहका घटना प्रसस्तै छन्। उनी भन्छन्, 'कतिपय महिलाले आफ्नै श्रीमान् त हो, किन कानुनी दायरामा ल्याउनु भन्ने सोचले क्षमा दिने गरेका छन्।'

'जिल्लामा मागी विवाहभन्दा प्रेम विवाह गर्नेको संख्या ठूलो छ। यसरी परिपक्व नभई एकदमै सानो उमेरमा विवाह बन्धनमा बाँधिएका सम्बन्ध परिपक्वता आएपछि सुमधुर बन्न सक्दैन, जसका कारण दोस्रो, तेस्रो विवाह गर्ने गरेको पाइन्छ,' अर्यालले थपे, 'पढ्ने उमेरमा विद्यालय छोडेर विवाह बन्धनमा बाँधिएका महिला आर्थिक हिसाबले कमजोर छन्, जसका कारण उनीहरु श्रीमान्‌को कमाइमा भर हुनुपर्ने बाध्यता छ। स्वावलम्बी हुन नसक्नुका कारण उनीहरुले बहुविवाहका मुद्दालाई बाहिर ल्याउन चाहँदैनन् बरु जीवनभर हिंसा सहेर बाँच्न तयार हुन्छन्।' 

अर्यालले बहुविवाह अन्त्यका लागि स्थानीय तहमार्फत कानुनी सचेतनाका कार्यक्रम गाउँगाउँमा पुग्नुपर्ने, शैक्षिक जागरणमा जोड दिनुपर्ने तथा बहुविवाहमा दण्डहिनताको अन्त्य गरी दोषीलाई कानुनी दायरामा ल्याउनुपर्ने बताए। 

यस्तै, प्रहरी नायब उपरीक्षक ज्ञानेन्द्रप्रसाद फुयाँलका अनसार कतिपय अवस्थामा पीडित महिला श्रीमान्‌ले मादक पदार्थ सेवन गरी कुटपिट गरेको, खान लगाउन नदिएको भन्दै प्रहरीमा उजुरी गर्न आइपुग्छन्, तर बहुविवाहको कुरा उठाउन चाहन्नन्। उनी भन्छन्, 'धेरैजसो पीडितले बहुविवाह एक किसिमको अपराध हो भन्ने कुरा बुझेकै छैनन्। बुझेकाहरुले पनि श्रीमान्‌को कुनै दिन बुद्धि फर्केला भनेर कुरेर बस्ने गरेका छन्।'

तपाईको प्रतिक्रिया

यसमा तपाइको मत


सम्बन्धित समाचार

अन्य समाचार पढ्नुहोस्