ad

एन्फा अध्यक्षमा कर्माछिरिङको उम्मेदवारी, अध्यक्षका २ आकांक्षीसहित ३ उपाध्यक्षको समर्थन

सीताराम कोइराला

Nepal Live

काठमाडौं– कर्माछिरिङ शेर्पाले अखिल नेपाल फुटबल संघ (एन्फा) को अध्यक्षमा उम्मेदवारी दिने घोषणा गरेका छन्। एन्फाका पूर्वउपाध्यक्ष तथा हिमालयन शेर्पा क्लबका अध्यक्ष शेर्पाले आगामी चैत १४ मा हुने एन्फा कार्यसमितिको अध्यक्षमा उम्मेदवारी दिने घोषणा गरेका हुन्।

नेपाली फुटबलको शुद्धीकरण र पारदर्शिताका लागि लामो समयदेखि आन्दोलन गर्दै आएका शेर्पाले शनिबार काठमाडौंमा आयोजित कार्यक्रममा आफ्नो उम्मेदवारी घोषणा गरेका हुन्। कार्यक्रममा बाक्लो संख्यामा एन्फा पदाधिकारी, जिल्ला संघका प्रतिनिधि तथा ए, बी र सी डिभिजन क्लबका प्रतिनिधिको उपस्थिति थियो।

एन्फालाई गतिशिल बनाउने, स्पष्ट कार्ययोजनासहित नीति बनाउने र फुटबल खेलाडी तथा प्रशिक्षकलाई खेल खेलेर बाँच्न बाउने योजनासहित शेर्पाले उम्मेदवारी घोषणा गरे।

अध्यक्षमा उम्मेदवारी घोषणा गरिसकेका एन्फाका पूर्व सिइओ तथा संकटा क्लबका अध्यक्ष इन्द्रमान तुलाधरले पनि शेर्पालाई समर्थन गरेका छन्। साथै अध्यक्षका अर्का आकांक्षी राष्ट्रिय टिमका पूर्वप्रशिक्षक कृष्ण थापाले पनि शेर्पालाई समर्थन गरेका छन्। 

उम्मेदवारी घोषणा कार्यक्रममा तुलाधरले एन्फामा लामो सयमसम्म काम गर्दा पनि परिर्वतन नआएकोमा दु:ख ब्यक्त गरे । साथै नेपाली फुटबलको विकासका लागि परिवर्तन आवश्यकता भएकाले शेर्पालाई समर्थन गर्ने बताए।

यस्तै पूर्व प्रशिक्षक थापाले शेर्पाबाट नेपाली फुटबलको विकास सम्भव देखेकाले समर्थन गरेको बताए।

दुई जना आकांक्षीले समर्थन गरेसँगै अध्यक्षमा औपचारिक आकांक्षीमा शेर्पा मात्र छन्। यद्यपी एन्फा अध्यक्ष नरेन्द्रलाल श्रेष्ठ र वरिष्ठ उपाध्यक्ष मणी कुँवरले पनि अध्यक्षमा उम्मेदवारी दिन छलफल अघि बढाइरहेका छन्।

शेर्पालाई एन्फाका उपाध्यक्षहरु किशोर राई, विजयनारायण मानन्धर र विरबहादुर खड्काले पनि समर्थन गरेका छन्। कार्यक्रममा मानन्धर र खड्का उपस्थित थिए। राईले भने शुभकामना सन्देश पठाउँदै शेर्पालाई समर्थन गरेको जानकारी गराएका थिए। खड्काले उपाध्यक्ष पदबाट राजीनामा दिँदै परिवर्तको पक्षमा आएको बताए।

अघिल्लो निर्वाचनका अध्यक्षका आकांक्षी टासी घले र विज्ञानराज शर्माले पनि शेर्पालाई समर्थन गरेको जनाएका छन्। घले एन्फाका मानार्थ अध्यक्ष तथा मनाङ मर्स्याङदी क्लबका पूर्व अध्यक्ष हुन्। शर्मा राष्ट्रिय टिमका पूर्व खेलाडी तथा नेपाल प्रहरीका अवकाशप्राप्त एआइजी हुन्।

शेर्पा एक वर्षअगाडि भएको अध्यक्ष निर्वाचनमा नरेन्द्र श्रेष्ठसँग पराजित भएका थिए। एन्फाका तत्कालीन अध्यक्ष गणेश थापा भ्रष्टाचारको आरोपमा विश्व फुटबल महासंघ फिफाबाट प्रतिबन्धमा परेपछि बाँकी रहेको एक वर्षको कार्यकालका लागि विशेष साधारण सभाबाट नेतृत्व चुनिएको थियो। 

शेर्पाले नेपाली फुटबलमा देखिँदै आएको विसंगतिविरुद्ध आवाज उठाउँदै आएका छन्। उनैले चलाएको 'सेभ नेपाली फुटबल' अभियानमार्फत एन्फामा दुई दशक नेतृत्व गरेका थापा भ्रष्टचारको आरोपमा दोषी ठहर भई १० वर्ष फुटबलबाट प्रतिबन्धमा परेका छन्।
 

प्राप्त प्रतिकृयाहरू

Goverdhan Singh. लेख्नुहुन्छ २o७४ माघ २७ शनिबार ७:४३ 

समर्थन काे लरकाे देखेर तबियत खुसहाेगया याराै।l

यसमा तपाइको मत


पढ्नै पर्ने