ad

म्युजिक भिडियो निर्देशक जीवन शाहीको अनुभवः रेमिट्यान्स र रहरले चलिरहेछ संगीत उद्योग

SHARES
Nepal Live

काठमाडौं– म्युजिक क्षेत्रमा चिनेजानेको नाम हो, जिवन शाही। उनी म्युजिक भिडायो निर्देशन गर्छन्, अभिनय र सम्पादनमा पनि दख्खल राख्छन्।

अहिलेको अवस्थामा म्युजिक भिडियो निर्माण गर्नु भनेको एक हिसाबले लगानीको माया मार्नु जस्तै हो। त्यसैले उनी भिडियो बनाउँदा निर्देशकले धेरै कुरामा ख्याल गर्नुपर्ने बताउँछन्। भन्छन्, ‘यसबाट आफ्नो करियर बनाउन चाहने गायक, गायिका, कलाकारको भावनालाई न्याय गर्न सक्नुपर्छ। मलाई यसमा आफू सफल छु जस्तो लाग्छ।’ 

नेपाली गीत संगीतलाई हेर्ने उनको आफ्नै दृष्टिकोण छ। बजारको अस्वस्थ प्रतिस्पर्धाप्रति असन्तुस्ट छन् उनी। शाही यसले नेपाली गीत–संगीत उद्योग धरापमा पर्दै गएको बताउँछन्। उनको ठहर छ, ‘अहिले करिब ९५ प्रतिशत रेमिट्यान्स र रहरले धानिरहेको छ संगीत उद्योग।’

संगीत उद्योगमा आश्रितहरुका लागि पक्कै पनि यो सुखको समाचार होइन। उनलाई लाग्छ, ‘म्युजिक कम्पनीहरुले गीतसंगीतबाट प्राप्त आम्दानीलाई अन्य क्षेत्रमा लगानी गरिरहेका छन्। गीतसंगीत क्षेत्रमा भने, विदेशमा बस्दै आएका नेपालीले त्यसमा पनि रहरका सर्जकहरुले लगानी गरिरहेका छन्।’

दिन प्रतिदिन खस्किरहेकाले संगीत उद्योगलाई जोगाउने हो भने यसमा आइरहेका विकृति विरुद्ध जुट्ने बेला आएको बताउँछन् शाही। 

भिडियो बनाउनु भन्दा बढी त्यसको प्रमोसनमा दुःख रहेको सुनाउँदै शाही भन्छन्, ‘पछिल्लो समय युट्युवले गर्दा, टिभी, एफएमहरुले गीत प्रसारण गर्न इन्कार गर्ने प्रवृत्ति छ। अर्कातिर हजारौं डलर तिरेर सामाजिक सञ्जालमा फेक दर्शक बढाउनेहरुको जमात पनि उत्तिकै छ।’

सामाजिक सञ्जालमा लाखौं तिरेर ‘हिट’ भइरहेकाहरुका कारण वास्तविक प्रतिभा ओझेलमा परेको उनको बुझाइ छ। यसले संगीत उद्योग महँगो बनाउँदै लगेको उनले बताए। 

चितवनमा जन्मिएका शाहीले गाउँकै श्रीपुर माविमा विद्यालय स्तरको शिक्षा प्राप्त गरेपछि उच्च शिक्षा भारतको चण्डीगढ पुगेर हासिल गरेका हुन्। उनले चण्डीगढमै मल्टिमिडियामा करियर सुरु गर्ने सोच लिएर भिडियो सम्पादनको तालिम लिए। सुरुमा थिएटरमा अभिनय र त्यसपछि भारतमै यस सम्बन्धी केही काम गरेपपछि उनी नेपाल फर्केका हुन्। 

सुरुमा उनलाई काम गर्न अनेक अवरोध आए। नयाँ प्रतिभालाई सजिलै नस्वीकार्ने यो क्षेत्रको चरित्र नै हो। अनेक संघर्षबाट गुज्रेर अहिलेको स्थान बनाएको उनी बताउँछन्।

उनले निर्देशनको सुरुवात गायिका टीका पुनको ‘फूल फूल डुल्ने पुतली’ बोलको गीतबाट गरेका हुन्। कल्याण गुरुङको शब्द, राजकुमार बगरको संगीत र प्रमोद खरेलको स्वरमा रहेको ‘जुन मायालाई फूल सम्झें’ बोलको गीतको म्युजिक भिडियोले आफूलाई बढी चर्चित बनाएको उनी बताउँछन्।

तपाईको प्रतिक्रिया

यसमा तपाइको मत


सम्बन्धित समाचार